السلام عليكم ورحمة الله
سباحين هي مدونة ابجمع فيها بعض السباحين
سباحين هي جت من حاجتي لسرد قصص على عيالي وحبيت تكون من كتابتي عشان اضمن على الاقل خلوها من المحاذير الشرعية والادبية . وهي ايضا ممكن يستفيد منها اي واحد مثل حالتي ويحب يسبحن .
وش معنى سباحين ؟
سباحين مصطلح يستخدمه اهل نجد تعبيرا عن القصة القصيرة واللي غالبا ما تكون خيالية بس ما تخلوا من عبرة ومتعه .. وغالبا الجدات يروون هالسباحين او القصص .
من وين تجيب قصص هالسباحين ؟
صراحة مهيب من راسي كلها خاصة الفكرة الاساسية
اعتمد على قصص من كتاب عبدالكريم الجهيمان (( اساطير شعبية )) وقصص متفرقة اخرى وبعضها بيكون من تالفي وفكرتي .
يعني انت تنقل القصة زي ماهي من كتاب الجهيمان مثلا ؟؟
لا مع انه اريح لي بس للاسف ان الاستاذ عبد الكريم اسلوبه بالفصحى على الغالب ويجيب القصة كما هي بدون تعديل اما انا ابغير في القصة شوي واحذف منها المقاطع اللي ما ابي عيالي يسمعونها :) غالبا اشياء ما تناسب سنهم .. وبيكون سردي بالعامي النجدي
بما اني غالبا ناقل للفكرة فلكم حرية النقل واكيد اني ابفرح اذا اشرت الى مصدر السبحونه .. والامر سهل وبسيط والهدف الوناسة
بس لا احد يوسع وجهه ويقول انا اللي كاتبها ومنذا الحركات الماصلة .
متى بتنزل سباحينك ؟
والله انا ملتزم بيوم الاربعاء كموعد اساسي ابنزل كل اربعاء سبحونة جديدة والله يعين .. وان ما نزلت فالعذر والسموحة من الحين :)
نقدر نشارك معك .. ؟
الله يحييكم والمدونة مدونتكم بس معليش اذا شفت في السالفة خنابيدز منيب ناشرها
وتقدر تتواصل معي بالبريد الخاص بالمدونة ذي ( SBA7EEN@gmail.com )
اتمنى للجميع المتعه والفايدة
اخوكم
ماجد بن عبدالله المنيع 
ليست هناك تعليقات:
إرسال تعليق